Fréttir

1208 nemendur hefja nám í grunnskólum Árborgar

26. ágúst 2014 17:20

„Ég heyri á skólastjórunum þremur að starfsfólk þeirra gengur til verka nú í haust með opinn huga og tilhlökkun. Hér er í sveitarfélaginu er öflugur hópur kennara, skólastjórnenda og annarra starfsmanna.

Þá hefur samstarf þeirra við starfsfólk nýstofnaðrar skólaþjónustu Árborgar verið gott og þróun þjónustunnar gengur vel. Námskeið fyrir skólastjórnendur leik- og grunnskóla, sem haldið var á síðasta skólaári í samstarfi við menntavísindasvið Háskóla Íslands, gekk afar vel og sýnist mér að það hafi eflt skólastjórnendur okkar í starfi.

Það skilar sér meðal annars í aukinni hæfni þeirra til að leiða þróun skólastarfsins og sterkari faglegum tengslum milli skólanna og innan hvers skóla,“ segir Þorsteinn Hjartarson, fræðslustjóri Sveitarfélagsins Árborgar þegar hann var spurður hvernig haustið legðist í skólamenn í Árborg. Þrír grunnskólar eru í sveitarfélaginu; Sunnulækjarskóli og Vallaskóli á Selfossi og Barnaskólinn á Eyrarbakka og Stokkseyri (BES).

Grunnskólarnir byrjuðu síðastliðinn föstudag en alls verða 1208 nemendur í skólanum í vetur eða 123 nemendur í BES, 560 í Sunnulækjarskóla og 525 í Vallaskóla. Nýir nemendur, sem byrja í sex ára bekk verða 113, eða 13 nemendur í BES, 55 í Vallaskóla og 65 í Sunnulækjarskóla.

Alls munu 219 starfsmenn starfa í grunnskólunum í vetur í mismunandi stöðugildum. Skiptingin er þannig að 42 starfsmenn eru í Barnaskólanum á Eyrarbakka og Stokkseyri, 87 í Vallaskóla og 90 í Sunnulækjarskóla.

Lestrahæfni og málþroski efldur
Þorsteinn segir að margt áhugavert og spennandi sé í gangi í skólum sveitarfélagsins. „Já, ég vil nefna sérstaklega skýrara verklag sem miðar að því að efla lestrarhæfni nemenda og málþroska, svo sem með markvissari notkun bestu mögulegu skimunartækja, og nýta niðurstöður þannig að nemendur sýni góðar framfarir í lestri og öðru námi.

Þá bind ég miklar vonir við metnaðarfullt þróunarverkefni leikskólanna þar sem einnig er unnið með læsi, málörvun og margt fleira. Í leikskólunum er jú lagður mikilvægur grunnur að frekara námi hvers barns í grunnskólum og framhaldsskólum. Málshátturinn „lengi býr að fyrstu gerð“ á vel við í þessu samhengi. Því viljum við leggja mikla áherslu á snemmtæka íhlutun í leikskólunum, þ.e. að hefja íhlutun sem allra fyrst ef grunur vaknar um frávik í þroska ungra barna,“ segir Þorsteinn.