Ögmundur Jónasson, samgönguráðherra, ætlar að leggja til við ríkisstjórnina að 30 milljónum króna verði varið á mánuði frá nóvember til mars til að dæla sandi úr Landeyjahöfn.
Þetta kemur fram í viðtali við Ögmund í vikublaðinu Fréttum í Vestmannaeyjum. Haft er eftir ráðherranum að til að mæta kostnaði geri hann ráð fyrir að fargjöld verði hugsanlega hækkuð tímabundið.
Fram hefur komið að gert var ráð fyrir 25 milljónum á ári í dælingu í Landeyjahöfn en 40 milljónum fyrsta árið, meðan botninn í höfninni væri að þéttast.
Ögmundur segir, að sandburður við suðurströndina hefði verið meiri en gert var ráð fyrir en frá sínum bæjardyrum séð væru aðrir kostir en Landeyjahöfn neyðarúrræði.
„Óvenjuleg vindátt og eldgos valda því að meiri sandur berst inn í höfnina en áætlað var og þess vegna er unnið að því að leigja öflugt sanddæluskip. Þess vegna ætla ég að leggja til við ríkisstjórnina á morgun [föstudag] að veita 30 milljónum í dælingu á mánuði frá nóvember og fram í marslok.“
Aðspurður um nýtt skip sagði Ögmundur að það væri seinni tíma verkefni. „Framtíðin liggur í nýju skipi en ég legg áherslu á að engir peningar eru til. Fólk er búið að fá nóg af stjórnmálamönnum sem lofa upp í ermina á sér þannig að ég mun fara mér hægt. Landeyjahöfn hefur skipt sköpum fyrir Vestmannaeyinga og nú verðum við að einbeita okkur að því að halda henni opinni alla tólf mánuði ársins,“ sagði Ögmundur við Fréttir.