Á fundi sveitarstjórnar Grímsnes- og Grafningshrepps í gær úthlutaði sveitarstjórn lóðum í fyrsta áfanga nýrrar byggðar vestan við Borg.
Um er að ræða sex lóðir og bárust samtals 64 umsóknir um þær, en á fundinum í gær voru væntanlegir lóðarhafar dregnir út að viðstöddum lögbókanda frá sýslumannsembættinu.
„Við bindum vonir við að lóðarhafar hefji framkvæmdir á sínum lóðum með haustinu. Það eru líkur á því að nýja byggðin verði mikil lyftistöng fyrir þéttbýlið á Borg og sveitarfélagið allt,“ segir Iða Marsibil Jónsdóttir, sveitarstjóri.
Gatnagerð á svæðinu er að mestu yfirstaðin og lokafrágangur við götur og lýsingu í fullum gangi þessa dagana.