Í nærri heila öld hafa 66°Norður og Slysavarnarfélagið Landsbjörg lifað með þjóðinni og átt í mjög farsælu samstarfi stóran hluta þess tíma. Samstarf þessara aðiila má rekja allt til ársins 1928, en 66°Norður hóf að framleiða hlífðarfatnað fyrir íslenska sjómenn árið 1926 sem björgunarsveitir tóku fljótt ástfóstri við. Þá þróaði 66°Norður um árabil fatnað fyrir björgunarsveitir landsins sem skýldi björgunarsveitarfólki fyrir óblíðri veðráttu landsins.
Það eru því ákveðin tímamót að 66°Norður og Slysavarnafélagið Landsbjörg kynni nú til sögunnar Landsbjargarhúfuna, hannaða af 66°Norður í samstarfi við Landsbjörg. Markmiðið var að hanna sterka, hlýja og endingargóða húfu með þarfir björgunarsveitarfólks í huga. Húfan er ekki síður hugsuð fyrir almenning til að nota allan ársins hring í útivist. Húfan er úr merino ullarblöndu og því sérstaklega hlý og mjúk.
Íslendingar skilja vel mikilvægi öflugra björgunarsveita og standa við bakið á þeim sem klettur. Í þeim náttúruhamförum sem riðið hafa yfir þjóðina undanfarin ár hefur mikilvægi Slysavarnafélagsins Landsbjargar aldrei verið mikilvægara. Mikið hefur mætt á björgunarsveitum síðustu ár og því aldrei verið brýnna en nú að landsmenn taki höndum saman og styðji þetta mikilvæga starf.
Innblástur fyrir mynstur Landsbjargarhúfunnar er hálendi Íslands og fjallagarðar landsins. Mynstrið er unnið út frá loftmynd af fjallaskaga á norðanverðu Íslandi. Loftmyndin var tekin árið 1999, sama ár og Slysavarnarfélag Íslands og Landsbjörg sameinuðust og til varð Slysavarnarfélagið Landsbjörg.
Húfan fer í sölu í verslunum 66°Norður og vefverslun Landsbjargar og 66°Norður þann 20 febrúar nk og kemur í takmörkuðu upplagi. Verðið á húfunni er 7.900 kr. og rennur ágóðinn af sölu húfunnar til styrktar Landsbjörg.
Fréttatilkynning
