Enn mælast lágtíðniskjálftar á Torfajökulssvæðinu með svipaðri virkni og í gær. Lágtíðniskjálftar hafa mælst á svæðinu frá því að fyrstu mælar voru settir upp árið 1986 en virknin nú er sérstæð að því leiti að hún er afar reglubundin og áköf.
Skjálftarnir eru litlir eða um hálft stig, þeir eru mjög líkir hver öðrum, óvenju langir og mælast með 5-15 mínútna millibili.
Í tilkynningu frá Veðurstofunni segir að nokkrar skýringar hafi verið nefndar til að skýra virknina; hæg hreyfing um grunnstæðan sprunguflöt; hreyfingar á seigfjótandi kvikuinnskoti og breytingar í jarðhitakerfinu.
Vísindafólk frá Háskóla Íslands og Veðurstofunni hittist í dag ásamt fulltrúa frá almannavarnadeild og ræddu virknina. Ekki er enn hægt að festa fingur á það ferli sem myndar skjálftana og töluverð óvissa er í staðsetningu þeirra en engin önnur gögn liggja fyrir sem benda til breytinga á svæðinu.
Áformuð voru tvö vísindaflug í grennd við Torfajökul um helgina og verða þau sameinuð athugunum vegna þessara tíðinda. Þar verður skoðað hvort áberandi breytingar hafa orðið á yfirborðsvirkni á jarðhitasvæðum og teknar verða myndir af svæðinu til að nota við samanburð síðar. Veðurstofan er með sólarhringsvakt og fylgist vel með framvindunni.