Enn eru tugir bíla fastir í snjó á Þrengslavegi og í Svínahrauni og ljóst að það mun taka langan tíma að greiða úr flækjunni.
Gríðarlega mikill snjór hefur safnast fyrir á veginum og eru nokkrir fólksbílar í röðinni bókstaflega á kafi í snjó.
Vegurinn lokaðist á fimmta tímanum í gær og sátu ökumenn og farþegar í langri bílaröð í nokkra klukkutíma, áður en björgunarsveitir komust á staðinn og fluttu fólk í fjöldahjálparmiðstöðvar Rauða krossins í Þorlákshöfn og Hellisheiðarvirkjun.
Hellisheiðin er einnig lokuð og á næst að athuga með opnun á henni klukkan 16. Lyngdalsheiði, Mosfellsheiði og hluti Þingvallavegar eru einnig lokuð.
