Á stjórnarfundi Byggðasafns Árnesinga í vikunni kom Sigurður Óli Guðbjörnsson til fundarins á sögulegum fornbíl, ÁR-67 Eigendur bílsins buðu safninu hann að gjöf og samþykkti stjórnin að þiggja bílinn.
Þessi bíll er oftast nefndur „Gistihúsbíllinn á Eyrarbakka“ og er Ford B módel árgerð 1930, vörubíll með farþegaboddíi. Þessi merka bifreið verður afhent safninu sumarið 2025.
Auk Sigurðar Óla eru eigendur bílsins María systir hans og Sigríður Dagný Ólafsdóttir, ekkja Erlings Ævarrs Kr. Jónssonar. Erlingur og Guðbjörn Frímannsson keyptu bílinn árið 1975 og gerðu hann upp en bíllinn fór á götuna árið 1978.