Leiðsögukonan og fjárfestirinn Tinna Sigurðardóttir hefur keypt flúðasiglingafélagið Arctic Rafting af Arctic Adventures. Tinna hefur tekið við rekstrinum og fór með sinn fyrsta hóp í flúðasiglingu 1. maí síðastliðinn.
Arctic Rafting mun bjóða innlendum og erlendum ferðamönnum upp á kanó- og flúðasiglingar í Hvítá í allt sumar. Félagið á sér langa sögu en það hóf flúðasiglingar árið 1983 undir vörumerkinu Bátafólkið. Fyrirtækin Bátafólkið og Arctic Rafting runnu síðan saman árið 2005 þegar Arctic Rafting er keypt af Torfa G. Yngvasyni og Jóni Heiðari Andréssyni, en þeir færðu það síðar undir vörumerkið Arctic Adventures þegar þjónustuframboð þeirra stækkaði. Tinna var þriðji starfsmaður þess félags árið 2006 og starfaði lengi sem sölustjóri og ævintýraleiðsögukona.
Bjartsýn á gott sumar
Bækistöðvar Arctic Rafting eru að Drumboddsstöðum í Biskupstungum og eru oftast kallaðar Drumbó. Gerðar voru flottar endurbætur á Drumbó í apríl og er búið að taka veitingastaðinn og barinn alveg í gegn. Í haust stefnir Tinna stórhuga á frekari uppfærslu á Drumbó og þá verða heitir pottar og gufan tekin upp á næsta stig.
Kajak- og flúðasiglingar eiga hug hennar allan og Tinna er alveg viss um að það sé áhugi fyrir kajak-skóla á Drumbó. „Það er mikilvægt að það sé til góð aðstaða fyrir þann samheldna hóp sem myndar grasrótina í vatnssportinu. Ég vonast til að geta dreift þekkingu og jafnvel haldið straumvatnsmót í framtíðinni,” segir Tinna. Hún er bjartsýn á gott sumar, þrátt fyrir mikla óvissutíma og tekur á móti fólki upp á Drumbó með bros á vör og hlýðir þríeykinu í einu og öllu.
