Brunavarnir Árnessýslu vilja beina því til sumarhúsaeigenda og íbúa á Suðurlandi að fara varlega með eldfæri út í náttúrunni í þeirri þurrkatíð sem nú stendur yfir.
Gróður er víða orðinn mjög þurr og því aukin hætta á gróðureldum.
Reykingafólk er sérstaklega beðið um að huga að því hvernig það gengur frá sígarettustubbum út í náttúrunni.
Þeir sem ætla að nota einnota grill verða að tryggja að ekki sé kveikt í því ofan á þurrum gróðri og ganga frá því að viðeigandi hátt.
Reykingar og grill eru helstu áhættuþættirnir þegar kemur að gróðureldum sem kvikna vegna gáleysis manna.
Þá geta gróðureldar einnig kviknað þegar bifreiðum er ekið í grónu landslagi en eldur getur kviknað þegar pústið kemst í snertingu við þurra sinu.
Sumarhúsaeigendur og íbúar eru hvattir til að vera á varðbergi og hafa garðslöngurnar klárar og sinuklöppur til að geta brugðist nógu hratt við ef gróðureldur kviknar og reyna að kæfa eldinn við fæðingu.
Ef vart verður við eld hringið þá strax í 112.