Matvælastofnun segir ljóst að þær aðgerðir sem gripið var til í Efstadal þann 4. júlí síðastliðinn hafi ekki borið árangur. Ferðamaður sem heimsótti Efstadal þann 8. júlí veiktist þann 11. júlí.
Síðastliðinn fimmtudag voru rannsökuð sýni frá sex einstaklingum og greindist enginn með E. coli sýkingu.
Alls hefur E. coli sýking því verið staðfest hjá 21 einstaklingi, þar af eru 19 börn og tveir fullorðnir. Ekkert barn er nú inniliggjandi á sjúkrahúsi af völdum STEC E. coli og enn er beðið eftir staðfestingu á greiningu hjá barni í Bandaríkjunum sem grunað er um alvarlega E. coli sýkingu.
Bakterían útbreiddari en áður var haldið
Niðurstöður frá þeim tveimur fullorðnu einstaklingum sem greindust með bakteríuna þann 17. júlí sýndu að báðir voru þeir með sömu tegund og greinst hefur í börnunum og kálfum í Efstadal. Annar einstaklinganna starfar í Efstadal og hefur verið einkennalaus. Viðkomandi hefur ekki starfað við matvælaframleiðslu eða afgreiðslu matvæla og hefur því ekki sérstaka tengingu við hina sýktu. Niðurstaðan sýnir hins vegar að E. coli bakterían er útbreiddari á staðnum en áður hefur verið sýnt fram á og ekki eingöngu bundin við kálfana.
Hinn einstaklingurinn er erlendur ferðamaður sem kom til landsins 5. júlí sl. Hann heimsótti Efstadal 8. júlí og veiktist 11. júlí. Í Efstadal neytti hann matvæla, þar á meðal íss en var ekki í samneyti við dýr.
Frekari úrbætur áður en ísframleiðsla hefst aftur
Í ljósi þessara upplýsinga hefur Heilbrigðiseftirlit Suðurlands í samráði við Matvælastofnun gert kröfur um úrbætur á nokkrum þáttum starfseminnar. Sala íss var stöðvuð þar til alþrif og sótthreinsun höfðu verið framkvæmd og lauk þeirri hreinsun í síðustu viku. Framleiðsla íss á staðnum var stöðvuð þann 5. júlí síðastliðinn og verður ekki hafin fyrr en að uppfylltum ákveðnum skilyrðum. Aðgengi að dýrum verður áfram lokað þar til viðunandi hreinlætisaðstaða/handþvottaraðstaða hefur verið sett upp. Efla þarf aðskilnað á milli veitingasvæða og dýra og þá þurfa starfsmenn sem vinna við matvæli að sýna fram á þeir séu ekki með bakteríuna STEC E.coli.
Einstaklega skæður stofn í Efstadal
Í tilkynningu frá Matvælastofnun segir að bakteríustofninn í Efstadal, E.coli O026, sé einstaklega skæður og gæti þessi stofn verið víðar. Því er fólk beðið um að gæta ætíð fyllstu varúðar í allri umgengni við dýr og meðferð matvæla í nálægð við dýr. Í þessu felst að þvo sér alltaf um hendur áður en matar er neytt og láta börn þvo sér eftir snertingu við dýr þar sem þau eru gjörn á að setja fingur oft í munn. Sótthreinsun með handspritti ein og sér er ekki nægjanleg heldur skal alltaf þvo hendur fyrst.