Einn lést í alvarlegu umferðarslysi sem varð á Suðurlandsvegi, skammt vestan Péturseyjar í Mýrdal, á sjöunda tímanum í kvöld. Þar varð harður árekstur milli dráttarvélar og jeppa.
Samkvæmt upplýsingum frá lögreglunni á Suðurlandi var einn aðili úrskurðaður látinn á vettvangi. Tveir slasaðir voru fluttir með þyrlu Landhelgisgæslunnar á Landspítalann í Fossvogi.
Rannsókn á tildrögum slyssins stendur yfir hjá lögreglunni á Suðurlandi.
Suðurlandsvegur var lokaður á meðan viðbragðsaðilar unnu á vettvangi en hann var opnaður aftur um klukkan 23:40.