Barbora Fialová hlaut umhverfisverðlaun Bláskógabyggðar 2024 en viðurkenningin var veitt á jólamarkaði Kvenfélags Laugdæla í Héraðsskólanum á Laugarvatni sl. laugardag.
Verðlaunin fær Barbora fyrir störf sín í þágu sveitarfélagsins en hún hefur unnið mikið og flott starf innan veggja Bláskógaskóla á Laugarvatni. Þar hefur hún unnið ötullega að umhverfismálum, m.a. í gegnum kennslu í útinámi, þar sem nemendur eru í miklum tengslum við náttúruna og umhverfi sitt. Útinámið tengir Barbora einnig við svokallaða dyggðakennslu sem hún innleiddi í skólakerfið á Laugarvatni.
Hún hlýtur einnig þessi verðlaun fyrir störf sín fyrir Planet Laugarvatn en hún hefur t.d staðið fyrir sorptínsludegi á Laugarvatni og eflt fólk til útivistar með allskonar viðburðum, líkt og ratleikjum o.fl.
