Sveitarstjórn Grímsnes- og Grafningshrepps skorar á Vegagerðina og stjórnvöld að hefja byggingu nýrrar Ölfusárbrúar sem allra fyrst.
Bókun vegna þessa var samþykkt á síðasta fundi sveitarstjórnar og þar er tekið undir bókun bæjarráðs Árborgar frá því í ágúst.
„Það er mikið hagsmuna- og öryggismál fyrir íbúa Grímsnes- og Grafningshrepps og íbúa Uppsveita Árnessýslu að umferðarflæði inn á Selfoss verði betra. Langar raðir liggja daglega upp að hringtorgi við Biskupstungnabraut og hægja þar með á umferð meðal annars úr Uppsveitum Árnessýslu,“ segir í bókun sveitarstjórnar en í búar Grímsnes- og Grafningshrepps sækja ýmsa þjónustu, til dæmis heilbrigðisþjónustu, á Selfoss.
„Því er mikilvægt að ekki séu stanslausar raðir og mikill biðtími eftir að komast inn á Selfoss. Ný Ölfusárbrú bætir umferðarflæði og umferðaröryggi í og við Selfoss fyrir alla íbúa Árnessýslu og marga fleiri, því er mjög mikilvægt að ný brú verði tekin í notkun sem allra fyrst,“ segir ennfremru í bókun sveitarstjórnar.