Björgvin G. Sigurðsson, fyrrverandi sveitarstjóri Ásahrepps, dró sér nokkur hundruð þúsund króna í starfi sínu sem sveitarstjóri. Honum var sagt upp fyrir helgi.
Egill Sigurðsson, oddviti Ásahrepps, staðfestir þetta í Fréttablaðinu í dag. Björgvin lét af störfum fyrir helgi og hefur verið ráðinn meðritstjóri Herðubreiðar.
Aðdragandi þess virðist hafa verið stuttur því aðeins þremur dögum fyrr sat Björgvin hreppsnefndarfund og var þar skipaður í starfshóp um endurbætur á heimasíðu sveitarfélagsins og í viðræðunefnd um aukið samstarf Ásahrepps og Rangárþings ytra.
„Þetta er leiðindamál sem kom blessunarlega mjög fljótt upp á yfirborðið,“ segir Egill Sigurðsson, oddviti Ásahrepps, í samtali við Fréttablaðið. „Líkt og flest sveitarfélög og fyrirtæki gera þá er það ekki sami maður sem bókar, samþykkir og greiðir. Það kerfi virkaði sem skyldi í þessu máli.“
Varðandi hvaða upphæð er um að tefla segir Egill að hún nemi hundruðum þúsunda en sé undir milljón króna. Björgvin hafi haft til umráða greiðslukort frá sveitarfélaginu sem hann nýtti til persónulegra nota.
„Við getum sagt með nokkurri vissu að þetta hafi hafist í októbermánuði í fyrra. Fyrst með litlum greiðslum hér og þar, en vatt upp á sig líkt og snjóbolti sem rúllar niður brekku,“ segir Egill.
„Björgvin á inni hjá okkur hálfsmánaðarlaun auk uppsafnaðs orlofs. Því verður skuldajafnað og svo verður staðan tekin í kjölfarið,“ segir Egill en hann á von á því að málið verið gert upp að fullu um næstu mánaðarmót.
Björgvin var ráðinn sveitarstjóri í júlí í fyrra. Egill Sigurðsson sagði í samtali við sunnlenska.is að hreppsnefnd hafi ekki tekið ákvörðun um hvaða leið verður farinn í ráðningarmálum. Egill mun sinna störfum sveitarstjóra þar til nýr sveitarstjóri hefur verið ráðinn.
Björgvin var viðskiptaráðherra í ríkisstjórn Samfylkingar og Sjálfstæðisflokks á árunum 2007-2009. Hann er varaþingmaður Samfylkingar í Suðurkjördæmi.
TENGDAR FRÉTTIR:
Björgvin hættur sem sveitarstjóri