Lögreglan á Suðurlandi stöðvaði í dag erlendan ferðamann fyrir hraðakstur á Suðurlandsvegi vestan við Vík í Mýrdal. Ökumaðurinn gekkst við brotinu og greiddi sektina á staðnum.
Þegar lögreglumenn fóru að kanna nánari deili á ökumanni og farþegum og hvenær fólkið hefði komið til landsins kom í ljós að ökumaður og einn farþegi áttu að vera í sóttkví frá 27. mars síðastliðnum.
Ferðamennirnir áttu því eftir að klára 5-6 daga sóttkví og fara í síðari sýnatöku og brutu því sóttvarnarreglur. Fólkið undirgekkst sektargerð vegna málsins og greiddi hvor 50.000 krónur fyrir brotið.
Ferðamennirnir kváðust hafa farið að skoða sig um í Reynisfjöru og ekki hafa komið nálægt öðru fólki.