Sveitarstjórn Mýrdalshrepps ákvað á fundi sínum í morgun að ráða Einar Frey Elínarson sem sveitarstjóra Mýrdalshrepps. Einar tekur við starfinu af Þorbjörgu Gísladóttur þann 1. ágúst næstkomandi.
Á síðasta kjörtímabili var Einar Freyr oddviti sveitarstjórnar. Hann skipaði 3. sætið á B-lista Framsóknar og óháðra í sveitarstjórnarkosningunum í maí og fékk B-listinn kjörna þrjá fulltrúa af fimm í sveitarstjórn. Á fundinum í morgun sátu fulltrúar A-listans hjá við ráðningu sveitarstjóra og bókuðu að þau telji að það hefði verið farsælla að auglýsa stöðu sveitarstjóra.
Björn Þór Ólafsson, oddviti B-listans, var kjörinn nýr oddviti Mýrdalshrepps á fundinum í morgun og Drífa Bjarnadóttir verður varaoddviti.
