Fyrstu aðgerðum í rannsókn banaslyssins við Núpsvötn þann 27. desember síðastliðinn þar sem bifreið var ekið út af brúnni er nú að ljúka.
Nú er beðið eftir niðurstöðum úr einstaka verkþáttum rannsóknarinnar, s.s. vettvangsmælingum, rannsókn á ökutækinu sjálfu, ýmsum sýnum sem aflað hefur verið, endanlegri niðurstöðu krufninga og fleira.
Ökumaður bílsins var yfirheyrður á sjúkrahúsi í gær en hann reyndist muna fátt um málsatvik. Hann nýtur réttarstöðu sakbornings en hinsvegar verður ekki gerð krafa um að hann sæti farbanni vegna rannsóknar og dómsmeðferðar málsins. Þar er einkanlega horft þeirra áverka sem hann hlaut í slysinu og fyrirsjáanlegrar læknismeðferðar sem fyrir liggur að hann þurfi að gangast undir vegna þeirra.
Ökumaðurinn ásamt bróður hans og börnunum tveimur bíða þess að fá vottorð læknis um að þau séu ferðafær og megi fara til síns heima í Bretlandi.
Samkvæmt upplýsingum lögreglu er gert ráð fyrir að þau þurfi öll að leggjast þar inn á sjúkrahús þar til frekari meðferðar þó áverkar þeirra séu mis alvarlegir.
Þetta kemur fram í stöðuuppfærslu lögreglunnar og þar segir enn fremur að ekki sé að vænta frekari frétta af rannsókninni frá lögreglu í bráð.