Olís hefur hætt eldsneytissölu við Litlu kaffistofuna á Suðurlandsvegi. Starfsleyfi þess efnis rann út þann 30. september og ekki reyndist unnt að endurnýja starfsleyfið nema til kæmu verulegar fjárfestingar við enduruppbyggingu afgreiðslusvæðisins, að því er fram kemur í tilkynningu frá Olís.
Litla kaffistofan var stofnuð árið 1960 og frá þeim tíma hefur jafnframt verið rekin eldsneytisafgreiðsla við hlið hennar. Í dag er veitingastaðurinn Hjá Hlölla rekinn í húsnæði Litlu kaffistofunnar og mun staðurinn halda starfsemi sinni áfram með óbreyttu sniði.
Í tilkynningunni biðst Olís velvirðingar á þeim óþægindum sem þetta kann að valda viðskiptavinum en bendir á þjónustustöð sína í Norðlingaholti sem er staðsett um 14 km vestan við Litlu kaffistofuna.