Vatnsborð Ölfusár við Selfoss heldur áfram að hækka vegna íss og krapa í ánni en klukkan 14:45 í dag sýndi vatnshæðarmælirinn við Selfosskirkju 4,99 metra sem er það hæsta sem hann hefur sýnt í vikunni.
Áin flæðir yfir bakka sína í kringum Ölfusárbrú og þar fyrir neðan. Aðeins neðar í ánni, fyrir ofan Bakkahverfið, rennur hún meðal annars yfir malbikaðan göngustíg.
Það hefur verið mikil umferð við ána í dag og eru bæjarbúar mjög áhugasamir um þetta sjónarspil. Að svo stöddu er engin hætta á ferðum og engin mannvirki í hættu. Í gær var unnið að því að grafa yfir nýju hitaveitulagnirnar við árbakkann ef jakar úr ánni færu á land og yfir opna skurði með nýju hitaveitulögninni.
Óvenju mikill ís svona snemma veturs
Sunnlenska.is hitti Einar Sindra Ólafsson, jarðfræðing hjá Eldfjalla- og náttúruvárhópi Suðurlands, á árbakkanum í dag. Hann hefur fylgst vel með þessum atburði í vikunni og segir áhugavert hve ísfull áin sé svo snemma veturs. „En við þurfum bara að bíða og sjá hvort að þetta sé búið að ná einhverju jafnvægi. Það er spáð veðrabrigðum annað kvöld með skammlífum hlýindum og þá verður áhugavert að sjá hvort að hún nái að ryðja einhverju af sér,“ segir Einar Sindri.
Í nótt sendi vakthafandi sérfræðingur á Veðurstofunni út tilkynningu þar sem varað var við ísstíflum sem hafa myndast víða, til dæmis í Ölfusá og Hvítá. Ástandið gæti varað fram yfir helgi, enn á mánudag er er spáð hlýindum.
Hér fyrir neðan eru nokkrar myndir sem teknar voru við Ölfusá í dag.
