Síðdegis í gær aðstoðuðu björgunarsveitir ferðalanga sem freistuðu þess að komast Fjallabaksleið, vestur fyrir Mýrdalsjökul, vegna vegalokana á Mýrdalssand.
Töluverð umferð var um þessa leið og var einhverjum snúið frá sökum þess að bifreiðar viðkomandi gætu lent í erfiðleikum, sérstaklega þar sem á leiðinni eru óbrúaðar ár. Gul viðvörun var í gildi á svæðinu vegna úrkomu og hafði verið varað við vatnavöxtum á þessum slóðum.
Draga þurfti þó nokkra bíla úr Hólmsá og voru þrír bílar skildir eftir við vaðið, þar af einn rafmagnsbíll sem var óökuhæfur.
