Í gærkvöldi óskuðu erlendir ferðamenn sem voru á ferð norðan Mýrdalsjökuls eftir aðstoð björgunarsveita eftir að þeir höfðu fest jeppa í vaði á Hólmsá á Syðri-Fjallabaksleið.
Björgunarsveitirnar Stjarnan í Skaftártungu og Lífgjöf í Álftaveri fóru til aðstoðar og nálguðust fólkið sitt hvoru megin árinnar, þar sem ekki var vitað hvort hún væri fær vegna vatnavaxta.
Vel gekk að losa bílinn þegar að var komið, og hélt fólkið til byggða niður Álftaversafrétt. Upphafleg áætlun hópsins var að gista í fjallaskála að Fjallabaki, en þeim var ráðlagt að halda til byggða vegna aðstæðna.
Rétt fyrir miðnætti voru allir komnir til byggða og aðgerðum lokið.
