Þriðjudaginn 13. júlí síðastliðinn töpuðust fimm hross frá leitarskálanum við Gatfell á Uxahryggjaleið.
„Fjögur af þessum hrossum eru þrælvön ferðahross og hafa farið víða um land en eitt þeirra er ungt og óvant. Þau eldri eru því spök og gæf,“ segir Guðrún Jónsdóttir á Sandbakka í Flóa sem er eigandi hrossanna í samtali við Eiðfaxa. „Það sáust spor sem við teljum að séu eftir þau við Tindaskaga en samkvæmt þeim var stefna þeirra í norðurátt.“
Tvö hrossanna eru jörp, tvö rauð með stjörnu og eitt bleikálótt.
„Við vorum að leggja af stað frá Gatfelli að morgni þegar við sáum að nokkur hross voru fyrir utan næturhólfið. Við fórum að vinna að því að koma þeim aftur inn en styggð kom að mínum hrossum með þeim afleiðingum að þau tóku sig úr hópnum og stukku af stað,“ segir Guðrún ennfremur.
Flogið hefur verið yfir heilmikið svæði sem talið er að hrossin gætu leynst á, ekkert hefur sést til þeirra. Guðrún biðlar til ferðalanga að hafa opin augun og láta hana vita ef einhver kann að hafa rekist á hrossin. Síminn hjá Guðrúnu er 863-9526 og hjá Davíð er 864-3444.