Lögreglan á Suðurlandi hefur til rannsóknar andlát karlmanns sem lést snemma í morgun. Áverkar á hinum látna benda til að andlátið hafi borið að með saknæmum hætti.
Þetta kemur fram í tilkynningu frá lögreglunni á Suðurlandi. Vísir greinir frá því að maðurinn hafi látist í Þorlákshöfn og að lögregla hafi stöðvað ökumenn á leið til og frá Þorlákshöfn á þriðja tímanum í nótt.
Rannsókn málsins er á frumstigum og er málið rannsakað sem manndráp. Fimm aðilar eru í haldi lögreglu í tengslum við rannsóknina.
Lögreglan á Suðurlandi fer með rannsókn málsins og hefur notið aðstoðar lögreglunnar á höfuðborgarsvæðinu, Suðurnesjum og Vesturlandi auk embættis héraðssaksóknara og sérsveitar ríkislögreglustjóra.
Vegna rannsóknarhagsmuna veitir lögreglan ekki nánari upplýsingar um málið að svo stöddu.