„Það er skemmtilegt að enda árið á að opna fimmtugustu hlöðuna á einum fjölsóttasta ferðamannastað landsins. Staðsetningin við Geysi hefur sterka tengingu við jarðhitann sem við hjá Orku náttúrunnar nýtum til að vinna rafmagn fyrir hin mikilvægu orkuskipti í samgöngum,“ segir Berglind Rán Ólafsdóttir, framkvæmdastjóri ON.
Orka náttúrunnar opnaði sína fimmtugustu hlöðu við Geysi í Haukadal í gær. Hlaðan er búin tveimur hraðhleðslutengjum auk Type 2 hleðslutengis.
Orkuskipti í ferðaþjónustu eru mikilvæg
Fulltrúar sveitafélagsins og rekstraraðilar af svæðinu voru ánægðir með þessa auknu þjónustu við ferðafólk.
„Hér er mikil umferð og nánast allir ferðamenn sem koma til landsins eiga leið hér um. Svo geta íbúar Bláskógarbyggðar nýtt sér þetta líka svo við erum bara glöð með að verið sé að þétta hleðslunetið og bæta þannig þjónustu við þá sem aka á rafbílum“, segir Ásta Stefánsdóttir, sveitarstjóri Bláskógarbyggðar.