Umhverfisstofnun hefur ákveðið að loka tímabundið svæðinu við Fjaðrárgljúfur í Skaftárhreppi fyrir ferðamönnum frá klukkan 9 í fyrramálið.
Núverandi göngustígur og bílastæði eru mjög illa farin vegna mikils fjölda ferðamanna, samhliða vorleysingum. Von er á mikilli rigningu á næstu dögum þar sem hætta er á að stígurinn skemmist enn frekar ef ekki verður brugðist við.
Í tilkynningu frá Umhverfisstofnun segir að stefnt sé að því að endurskoða lokunina innan tveggja vikna. Ef svæðið verður í stakk búið til að taka á móti gestum án þess að hætta sé á frekari skemmdum, verður svæðið opnað fyrr.
