Umhverfisstofnun mun loka Fjaðrárgljúfri frá og með morgundeginum, 9. janúar, þar sem mikið álag er á svæðinu og hætta á umtalsverðum skemmdum á gróðri meðfram göngustígum vegna ágangs ferðamanna.
Í tilkynningu frá Umhverfisstofnun segir að veðurfar undanfarnar vikur, hlýindi og mikil rigningartíð, hefur orðið þess valdandi að göngustígur meðfram gljúfrinu liggur undir skemmdum og er illfær vegna aurbleytu og leðju. Þetta gerir það að verkum að gestir ganga utan við göngustíginn.
Gróður er í dvala á þessum árstíma og svæðið sérstaklega viðkvæmt fyrir átroðningi. Það skemmist hratt með ágangi utan göngustígs auk þess sem nýir villustígar verða til.
Mikill fjöldi ferðamanna heimsækir svæðið á degi hverjum og er álag á göngustíg og umhverfi hans gríðarlegt. Í sumar var lokið við endurgerð og uppbyggingu á hluta göngustígarins og er sá hluti í góðu ásigkomulagi.
Búið er að hanna nýjan göngustíg meðfram öllu gljúfrinu sem mun þola umhleypinga eins og hafa verið undanfarnar vikur. Stefnt er á að hefja þær framkvæmdir við fyrsta tækifæri.
Svæðið verður opnað aftur þegar aðstæður batna. Stefnt er að því að endurskoða lokunina eigi síðar en innan tveggja vikna eða ef ástand breytist fyrir þann tíma.
Umhverfisstofnun biður ferðaþjónustuaðila að upplýsa viðskiptavini um að Fjaðrárgljúfur sé lokað og vísa ekki fólki þangað. Bílastæði er einnig lokað og ekki hægt að leggja bílum í næsta nágrenni við svæðið.
Fjaðrárgljúfur closed
The Environment Agency has closed the area Fjaðrárgljúfur for nature protection. Due to thawing conditions the area has been damaged greatly by traffic and is prone to further damage. The area will remain closed until conditions change. Entering the area is strictly forbidden.
Please help us to protect the nature and respect closing in nature conservation areas.