Síðastliðinn föstudag opnaði Húsasmiðjan nýja og glæsilega verslun við Larsenstræti 6 á Selfossi. Fjölmenni var við opnunina enda hefur eftirvæntingin eftir nýju Húsasmiðjunni verið mikil meðal Sunnlendinga.
„Starfsemin var áður í húsnæði sem komið var til ára sinna en nýja húsnæðið uppfyllir helstu kröfur nútímans varðandi hagkvæmni og orkunýtingu ásamt því að vera sérsniðið fyrir starfsemi Húsasmiðjunnar, Blómavals og rafiðnaðarverslunarinnar Ískrafts,“ segir Árni Stefánsson, forstjóri Húsasmiðjunnar, í samtali við sunnlenska.is.
Nýja húsnæðið er tæpir 5.200 fermetrar og lóðin 17.4000 fermetrar. THG arkitektar teiknuðu húsið en innra skipulag verslunarinnar var unnið í samvinnu við breska hönnunarfyrirtækið M WorldWide.
„Það hefur verið mikil gróska og uppbygging á Selfossi og í nágrenni undanfarin ár og við höfum tekið virkan þátt með okkar frábæra fólki á Selfossi. Með nýrri verslunar- og þjónustumiðstöð getum við enn betur þjónustað stærra samfélag og bjóðum upp á enn meira vöruúrval og öflugri þjónustu,” segir Árni.
Jákvæðri upplifun viðskiptavina lykilatriði
Auk nýrra þjónustuþátta og meira vöruúrvals er leitast við að skerpa á upplifun viðskiptavina með stafrænni miðlun og sjónrænni upplifun.
„Jákvæð upplifun viðskiptavina og gott vinnumhverfi starfsfólks er eitt lykilatriða í nútíma verslunarrekstri. Það er mikil hægðarauki að verslun okkar og timbursalan ásamt rafiðnaðarverslun Ískraft séu öll undir sama þaki og innangengt á milli. Hönnun hússins tekur jafnframt mið af nýjustu umhverfiskröfum, með tilliti til orkunotkunar, einangrunar, loftræstingar og lágmörkunar sóunar í rekstri.” segir Árni.
„Í versluninni er stórbætt úrval af verkfærum og timbursalan stór og hægt að stafla beint í bíla. Þá hefur verið sett upp gott sýningarrými fyrir heimilistæki, gólfefni og hreinlætistæki. Verslun Blómavals er glæsileg, með fallegar vörur fyrir heimilið, ræktunarvöru, pottaplöntur og auðvitað fersk afskorin blóm alla daga. Útibú Ískraft er nýtt og stærra, en fyrirtækið sérhæfir sig í vörum til rafverktaka, iðn- og orkufyrirtækja og hefur verið í miklum vexti undanfarin ár,“ segir Árni að lokum.
