Framhaldsskólar landsins eru með í verkefninu „Forvarnardagurinn“ í fyrsta sinn í ár.
Nokkur undanfarin ár hafa grunnskólar landsins helgað 5. október forvörnum af ýmsum toga. Það var Forseti Íslands ásamt sveitarfélögunum sem kom þessu verkefni af stað og hefur dagurinn fest sig í sessi.
Nú eru framhaldsskólar landsins með í verkefninu í fyrsta sinn. Í Menntaskólanum að Laugarvatni verða tvær síðustu kennslustundirnar fyrir hádegi í dag notaðar í fræðsluerindi sem tengjast þessu málefni.
Gylfi Haraldsson, heilsugæslulæknir í Laugarási, mun ræða við alla nemendur á sal um þau áhrif sem það hefur á líkamannn að neyta kannabisefna. Ekki er víst að allir geri sér fulla grein fyrir hvað það getur haft í för með sér að neyta þeirra og gott að fá lækni til að svara beint spurningum, sem líklega munu koma upp varðandi það.
Á eftir honum mun Ingvar Guðmundsson, lögreglumaður frá Selfossi, ræða við nemendur um hvað það hefur í för með sér gagnvart löggjafanum að vera tekinn með þessi efni á sér eða fyrir neyslu þeirra. Líklega munu margar spurningar vakna eftir það erindi.
Í framhaldi af erindum þeirra Ingvars og Gylfa verður farið með 1. bekk í ferð til Reykjavíkur, þar sem höfuðstöðvar SÁÁ í Efstaleitinu verða heimsóttar. Þar munu krakkarnir fá að heyra allt um starfsemi samtakanna og ýmsar sláandi tölulegar staðreyndir varðandi innlagnir hjá þeim. Einnig verða eineltismál rædd almennt.
Að lokum mun fulltrúi frá tryggingafélögunum koma og ræða við krakkana um það hve akstur á vegum landsins er mikil dauðans alvara en nú styttist í bílprófið hjá 1. bekkingum.
Í lok dags verður pizzuveisla og síðan farið í keilu eða bíó áður en haldið verður heim á leið.