Á næstu dögum hefjast framkvæmdir vegna uppbyggingar nýrra gönguleiða við Geysi í Haukadal. Samkvæmt áætlunum verktaka munu þær standa yfir fram á haust.
Í tilkynningu frá Framkvæmdasýslunni-Ríkiseignum segir að gönguleiðirnar muni auka öryggi gesta, bæta aðgengi og upplifun ásamt því að auðvelda stýringu flæðis gangandi gesta með tilliti til gróðurverndar.
Framkvæmdunum getur fylgt bæði truflun fyrir gesti og jarðrask en þess mun verða gætt eftir fremsta megni að halda raski í lágmarki og lagfæra eins og hægt er að framkvæmd lokinni. Aðgengi að hverasvæðinu verður að mestu óhindrað á framkvæmdatíma en þó gæti þurft að takmarka það að hluta eftir framvindu verks.
Landmótun sf. landslagsarkitektar hanna breytingarnar á Geysissvæðinu. Hönnunin er byggð á sigurtillögu fyrirtækisins í samkeppni sem lauk árið 2014, en hefur verið aðlöguð að stóraukinni umferð ferðafólks um svæðið.
Framkvæmdir á svæðinu eru í höndum Wiium ehf verktaka. Umsjónaraðili verkefnisins fyrir hönd Umhverfisstofnunar er Framkvæmdasýslan–Ríkiseignir.
Geysissvæðið hefur verið friðlýst frá árinu 2020 og er einn fjölsóttasti áfangastaður ferðamanna á Íslandi.
