Úrskurðarnefnd umhverfis- og auðlindamála hefur ákveðið að stöðva framkvæmdir við fyrirhugaða landfyllingu við Suðurvararbryggju í Þorlákshöfn, tímabundið á meðan nefndin tekur fyrir kæru sem barst frá Brimbrettafélagi Íslands.
Bæjarstjórn Ölfuss samþykkti að veita framkvæmdaleyfi fyrir landfyllingunni á fundi sínum þann 30. janúar. Síðastliðinn mánudag lagði Brimbrettafélag Íslands fram kvörtun við úrskurðarnefnd umhverfis- og auðlindamála þar sem þess er krafist að leyfið yrði fellt úr gildi og að framkvæmdir yrðu stöðvaðar á meðan málið er til úrskurðar.
Félagið hefur bent á þær alvarlegu afleiðingar sem framkvæmdin mun hafa á brimbrettasvæðið við Þorlákshöfn, einkum Aðalbrotið, sem er einstakt öldusvæði á landsvísu. Í kæru sinni bendir brimbrettafélagið á að þær breytingar sem landfyllingin hefur í för með sér séu óafturkræfar og muni hafa áhrif á umhverfi og útivistarmöguleika í Þorlákshöfn til frambúðar.
Í fréttatilkynningu frá Brimbrettafélagi Íslands er þessari bráðabirgðaákvörðun úrskurðarnefndarinnar fagnað og einnig kemur þar fram að íbúar í Þorlákshöfn hyggist hefja undirskriftasöfnun til að framkvæma íbúakosningu varðandi framkvæmdina og verndun þessa útivistarsvæðis.