Trúnaðarráð Bárunnar, stéttarfélags fordæmir frumvarp til laga um félagafrelsi á vinnumarkaði, sem lagt var fram af þingmönnum Sjálfstæðisflokksins, annarra en ráðherra og forseta þingsins.
Þetta kemur fram í ályktun sem trúnaðarráðið samþykkti á fundi sínum í gær.
Trúnaðarráðinu þykir furðu sæta í byrjun kjarasamningsviðræðna að fá þessa köldu gusu framan í launafólk. Gildissvið frumvarpsins er allur vinnumarkaðurinn, og er því frumvarpinu ætlað að ná til bæði almenns og opinbers vinnumarkaðs.
„Yfirlýst markmið frumvarpsins er að tryggja félagafrelsi á vinnumarkaði, nánar tiltekið neikvætt félagafrelsi, þar sem stéttarfélög eiga að vera á „félagsmannaveiðum“. Tilgangur stéttarfélaganna er að sameina launafólk, vinna að sameiginlegum hagsmunum launafólks, gæta réttar launafólks í hvívetna og vinna að fræðslu og menningarmálum,“ segir í ályktun trúnaðarráðsins.
„Næði þetta frumvarp fram að ganga yrði það gróf aðför að launafólki, starfsemi stéttarfélaga og vinnumarkaðsmódelinu sem hefur verið góð sátt um á Íslandi og aðrar þjóðir hafa horft til með virðingu,“ segir ennfremur í ályktuninni en Báran stéttarfélag skorar á þingheim að hafna slíkri aðför að launafólki og minnir á að launafólk eru kjósendur þeirra.