Fyrsta skóflustungan að nýrri leikskólabyggingu á Hvolsvelli var tekin í síðustu viku.
Þau Lilja Einarsdóttir, sveitarstjóri, Anton Kári Halldórsson, oddviti og Sólbjört S. Gestsdóttir, leikskólastjóri sáu um að taka skóflustunguna en þau voru þó alls ekki ein um verkið þar sem allir nemendur leikskólans voru mættir með skóflu í hönd og voru þau komin vel á veg með jarðvinnuna áður en yfir lauk. Börnin sungu einnig tvö lög sem þau voru búin að æfa fyrir tilefnið.
Nýi leikskólinn verður átta deildir en þó með möguleika á því að stækka upp í tíu deildir svo það verður vel rúmt um alla. Samkvæmt upplýsingum frá P ark teiknistofu, sem hannar leikskólann, verður skólinn með stærstu leikskólabyggingum á landinu. Gert er ráð fyrir að hægt verði að taka á móti 180 börnum þegar hann verður tilbúinn í byrjun árs 2023.
Nýja leikskólabyggingin er staðsett við Vallarbraut og þá verður allt skóla- og íþróttasvæði á sama stað.
