Héraðsdómur Suðurlands féllst í dag á kröfu lögreglustjórans á Suðurlandi um að konu yrði gert að sæta gæsluvarðhaldi í eina viku vegna máls sem lögreglan hefur rannsakað frá því á mánudagskvöld og varðar frelsissviptingu, fjárkúgun og manndráp.
Alls sæta nú fjórir aðilar, tveir karlar og tvær konur, gæsluvarðhaldi vegna rannsóknar málsins. Síðar í kvöld mun fimmti aðilinn, karlmaður sem handtekinn var í gærkvöldi, verða leiddur fyrir dómara og krafist gæsluvarðhalds yfir honum.
Landsréttur staðfesti fyrr í dag gæsluvarðhaldsúrskurð Héraðsdóms Suðurlands frá því á miðvikudag yfir þeim tveim aðilum sem kærðu úrskurðina til Landsréttar.
Í tilkynningu frá lögreglunni á Suðurlandi segir að rannsókn málsins miði vel og haldi áfram af fullum þunga. Vegna rannsóknarhagsmuna er ekki unnt að veita nánari upplýsingar í málinu að svo stöddu.