Símon Oddgeirsson í Dalsseli undir Eyjafjöllum færði Skógræktinni á dögunum höfðinglega gjöf, 68 hektara landspildu á Markarfljótsaurum sem hann hefur grætt upp og ræktað á skóg með stuðningi Skógræktarinnar.
Svæðið var að mestu gróðurlausir malaraurar þegar Símon hófst handa við skógrækt og uppgræðslu í kringum síðustu aldamót. Nú hefur svæðið verið grætt upp og þar eru uppvaxandi skógar sem Símon hefur nú falið Skógræktinni til áframhaldandi varðveislu, gróðursetningar og umsjár.
Hæstu trjábeltin á svæðinu sem eru að nálgast tíu metra hæð skapa skjól fyrir nærliggjandi svæði. Svæðið er norðan við þjóðveg 1 á móts við afleggjarann að ferjuhöfninni í Bakkafjöru. Þar eru tjarnir með ríkulegu fuglalífi og stefnir Skógræktin að því að gera svæðið aðgengilegt almenningi á næstu árum.
Símon Oddgeirsson er ættaður frá Eyvindarholti en hefur búið í Dalsseli, lengst af í félagsbúi með Einari bróður sínum. Hann dvelur nú á hjúkrunar- og dvalarheimilinu Kirkjuhvoli á Hvolsvelli.
Í frétt á heimasíðu Skógræktarinnar segir að í framtíðinni verði leitast við að halda áfram góðu starfi Símonar á Markarfljótsaurum.
Trausti Jóhannsson skógarvörður og Þröstur Eysteinsson skógræktarstjóri virða fyrir sér verk Símonar. Ljósmynd: Hreinn Óskarsson