Á fundi bæjarstjórnar Árborgar í síðustu viku var lögð fram til fyrri umræðu tillaga að fjárhagsáætlun fyrir árið 2019 þar sem gert er ráð fyrir 505 milljóna króna afgangi.
„Helst ber til tíðinda að gert er ráð fyrir að A-hluti skili 48,5 milljóna króna afgangi og er það í fyrsta sinn frá árinu 2008 sem áætlun fyrir A-hluta er skilað með afgangi, utan þess að gert var ráð fyrir 4 m.kr. afgangi í þeirri áætlun sem lögð var fram fyrir ári síðan,“ segir í fréttatilkynningu frá sveitarfélaginu.
Samkvæmt áætluninni eru álagningarprósentur skatta á íbúðarhúsnæði lækkaðar til að mæta þeirri miklu hækkun sem orðið hefur á fasteignamati í sveitarfélaginu. Þannig lækkar fasteignaskattur úr 0,325% í 0,275%.
Gert er ráð fyrir að skuldaviðmið sveitarfélagsins verði 122,7% á árinu 2019 en vegna breytinga á lögum um þetta viðmið reiknast það 106,7% samkvæmt nýjum reglum.
„Bættur rekstur mun gera kleift að bæta þjónustu við íbúa og auka þannig velsæld og ánægju í sveitarfélaginu. Myndarlegur rekstrarafgangur er einnig nauðsynlegur svo sveitarfélagið hafi aukna getu til fjárfestinga í nauðsynlegum innviðum á borð við leikskóla, grunnskóla, íþróttahús og fráveitu – sem er mikilvægt þegar fjölgun íbúa er eins hröð og nú gerist í Árborg,“ segir í fréttatilkynningunni.
Fjárfest í innviðum fyrir rúma 10 milljarða króna
Árborg mun fjárfesta í innviðum fyrir rúmlega 10 milljarða á næstu fjórum árum. Uppbygging íbúabyggðar í Björkurstykki, með um 650 íbúðum og nýjum grunnskóla, uppbygging íþróttamannvirkja við Engjaveg, nýr leikskóli og hreinsistöð fráveitu verða stærstu einstöku fjárfestingarnar á tímabilinu.
„Aldrei áður í sögu sveitarfélagsins hefur verið fjárfest jafn mikið í samfélagslegum innviðum og gert verður á næstu fjórum árum. Til að mæta uppsafnaðri fjárfestingaþörf síðustu ára er mikil fjárfesting framundan á næstu tveimur árum en minnkar á síðari hluta tímabilsins. Meðal annars verður aukinn kraftur verður settur í orku- og vatnsöflun,“ segir í fréttatilkynningunni sem send var út að loknum fundinum.