Bæjarstjórn Hveragerðisbæjar samþykkti á síðasta fundi sínum að ein klukkustund á dag verði gjaldfrjáls í öllum árgöngum í leikskólum bæjarins frá 1. september næstkomandi.
Í málefnasamningi nýs meirihluta bæjarstjórnar Hveragerðisbæjar segir að vilji sé til að létta undir með barnafjölskyldum og stefnir meirihlutinn á 6 tíma gjaldfrjálsa leikskóladvöl í skrefum á kjörtímabilinu.
„Leikskólinn er fyrsta skólastigið og þar læra börnin á skapandi hátt og í gegn um leik allt milli himins og jarðar. Sveitarfélögin bera meginábyrgð á skólahaldi, byggingu og reksturs leikskóla. Sveitarfélögunum er einnig skylt að tryggja börnum dvöl á leikskóla og mikilvægt er að öll börn hafi tækifæri á því að sækja fyrsta skólastigið sem leikskólinn er,“ segir í tilkynningu frá Hveragerðisbæ.