Jólin verða kvödd á Selfossi með glæsilegri þrettándagleði sunnudaginn 6. janúar. Gleðin hefst með blysför frá Tryggvaskála kl. 20:00.
Hátíðin verður með hefðbundnu sniði og sér Ungmennafélag Selfoss um framkvæmdina. Blysförin verður farin frá Tryggvaskála að brennustæði á tjaldstæði Gesthúsa þar sem kveikt verður í þrettándabálkesti.
Jólasveinarnir kveðja og álfar og tröll mæta á svæðið. Þá verður glæsileg flugeldasýning í umsjón félagsins með stuðningi Björgunarsveitar Árborgar.
Í tilkynningu frá Ungmennafélagi Selfoss segir að gaman væri að sjá sem flesta bæjarbúa í trölla-, álfa eða jólasveinabúningum.
Þeim sem taka þátt í blysförinni er bent á bílastæði við Ráðhúsið, Krónuna og Hótel Selfoss. Nokkur bílastæði eru við Austurveg en á leið göngunnar að brennustæðinu er fjöldi góðra bílastæða við leikskólann Álfheima og Vallaskóla, við Sundhöll Selfoss og Fjölheima. Vegna blysfararinnar lokast Engjavegur frá Reynivöllum að Rauðholti og er fólki bent á að leggja í nálæg bílastæði. Má nefna að mikill fjöldi bílastæða er við íþróttahúsið Iðu og Fjölbrautaskóla Suðurlands auk góðra bílastæða við leikskólann Hulduheima. Þá eru og bílastæði við Selið en eins og áður segir er mælst til þess að bílum sé ekki lagt við Engjaveg á milli Reynivalla og Rauðholts.
Þar sem fjöldi ungra barna sækir þrettándagleðina er þeim tilmælum beint til fólks að vera ekki með flugelda nærri blysförinni eða við brennuna.
Grýla og Leppalúði taka veðrið um hádegi
Fólk er hvatt til að fylgjast með fréttum ef veðurspáin lítur illa út. Langtímaveðurspá gerir ráð fyrir hæglætisveðri á þrettándanum með vægum hita og tiltölulega þurru veðri. Venju samkvæmt munu Grýla og Leppalúði reka fingurinn upp í loft um hádegi á þrettándanum til að meta veðurhæð og skyggni. Þá munu þau og hringja í veðurskip Lima sem hefur nýjustu fréttir um ganga lægða og hægða á Grænlandssundi. Einnig er von á Völustakk syni þeirri í mat á þrettándanum og ber hann þeim nýjustu fréttir af veðri í Aðsigi, hvar hann er búsettur nú um stundir.