Nýtt og glæsilegt félagsheimili Stangaveiðifélags Selfoss á Fossnesi við Ölfusá var vígt í dag við hátíðlega athöfn. Húsið hefur fengið nafnið Víkin, en svo nefnist veiðisvæðið sem það stendur við.
Guðmundur Marías Jensson, formaður SVFS, ávarpaði gesti, fór yfir sögu félagsins, og þakkaði sérstaklega bæjaryfirvöldum í Árborg og Gunnari Egilssyni, fyrrverandi bæjarfulltrúa, fyrir stuðninginn við byggingu nýja félagsheimilisins. Aðdragandinn að byggingu þess hafi verið langur, en fyrsta skóflustungan var tekin sumarið 2016 og síðan þá hafa félagsmenn í SVFS byggt húsið í sjálfboðavinnu. Hluti hússins var tekinn í notkun í fyrrasumar.
Örn Grétarsson afhjúpaði skilti með nafni hússins, en eftir nafnasamkeppni innan félagsins var nafnanefnd sammála um að húsið skyldi heita Víkin. Sr. Arnaldur Bárðarson, prestur á Selfossi, blessaði húsið og gestir fluttu ávörp og færðu félaginu ýmsar gjafir sem nýtast munu í húsinu.
Veiðimennirnir eru ekki hættir að fagna, því Stangaveiðifélag Selfoss fagnaði 75 ára afmæli á síðasta ári en sökum samkomutakmarkana var ekki hægt að halda upp á tímamótin fyrr en nú. og verður afmælishátíð félagsins haldin á Hótel Selfossi í kvöld.
