Sumar og vetur frusu ekki saman en hvergi á Suðurlandi var frost í nótt. Frjósi sumar og vetur saman segir íslensk þjóðtrú það góðs viti og að heyfengur verði góður í sumar.
Það var ekki einu sinni hægt að finna bláar tölur á hálendinu, en á Hveravöllum var fjögurra stiga hiti upp úr miðnætti. Hlýjast var við ströndina, 7-8°C hiti.
Rjóminn jafn þykkur og ísskánin
Í bókinni Sögu daganna segir Árni Björnsson að hvarvetna hafi verið fylgst með því hvort frost væri aðfaranótt sumardagsins fyrsta, þ.e. hvort saman frysti sumar og vetur.
Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.
Ekki frosið saman í sjö ár
Frá því mælingar sunnlenska.is hófust árið 2010 hafa sumar og vetur sjaldnar frosið saman en athygli vekur að síðastliðin sjö ár, eða frá árinu 2017 hafa sumar og vetur ekki frosið saman. Þrátt fyrir það hafa sumardagarnir undanfarin ár verið hlýir og sólríkir, ef frá er talið árið 2018, sem var skelfilega kalt rigningarsumar. Ritstjórn sunnlenska.is telur því – þrátt fyrir þjóðtrúna – talsverðar líkur á hlýju og góðu sumri 2023.
Sunnlenska.is óskar lesendum sínum gleðilegs sumars.