Sumar og vetur frusu ekki saman en hvergi á Suðurlandi var frost á miðnætti en hiti fór reyndar rétt niður fyrir frostmark í uppsveitunum um miðja nótt. Frjósi sumar og vetur saman segir íslensk þjóðtrú það góðs viti og að heyfengur verði góður í sumar.
Á Hveravöllum var tveggja stiga frost á miðnætti en hlýjast var við ströndina, 5-7°C hiti.
Rjóminn jafn þykkur og ísskánin
Í bókinni Sögu daganna segir Árni Björnsson að hvarvetna hafi verið fylgst með því hvort frost væri aðfaranótt sumardagsins fyrsta, þ.e. hvort saman frysti sumar og vetur.
Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.
Ekki frosið saman í átta ár
Frá því mælingar sunnlenska.is hófust árið 2010 hafa sumar og vetur sjaldnar frosið saman en athygli vekur að síðastliðin átta ár, eða frá árinu 2017 hafa sumar og vetur ekki frosið saman. Þrátt fyrir það hafa sumardagarnir undanfarin ár verið hlýir og sólríkir, ef frá er talið árið 2018, sem var skelfilega kalt rigningarsumar. Ritstjórn sunnlenska.is telur því – þrátt fyrir þjóðtrúna – talsverðar líkur á hlýju og góðu sumri 2024.
Sunnlenska.is óskar lesendum sínum gleðilegs sumars.