Landsvirkjun er 50 ára í dag en fyrirtækið var stofnað þann 1. júlí árið 1965, í tengslum við byggingu Búrfellsvirkjunar.
Stofnendur og helmingshluthafar voru íslenska ríkið og Reykjavíkurborg en nú er ríkið eini eigandi fyrirtækisins. Búrfellsstöð var fyrsta stórframkvæmd fyrirtækisins og stærsta framkvæmd Íslandssögunnar á þeim tíma. Með byggingu hennar var lagður grunnur að nýjum iðnaði í landinu sem leiddi af sér aukna verkþekkingu og fjölbreyttara atvinnulíf á Íslandi.
Í dag starfrækir Landsvirkjun fjórtán vatnsaflsstöðvar og tvær jarðvarmastöðvar á fimm starfssvæðum. Í byggingu er auk þess jarðvarmavirkjun á Þeistareykjum. Þá stendur yfir rannsóknarverkefni með tvær vindmyllur á Hafinu norðan við Búrfell. Hjá Landsvirkjun starfa nú um 250 manns.
Í tilefni af 50 ára afmælinu hefur Landsvirkjun m.a. staðið fyrir opnum fundum um málefni er varða fyrirtækið. Fyrir utan opinn ársfund fyrirtækisins í Hörpu 5. maí sl. hafa verið haldnir tveir fundir um loftslagsmál, fundir með íbúum á Norðausturlandi um Þeistareykjavirkjun og á Suðurlandi um stækkun Búrfells. Einnig bauð Landsvirkjun til fundar um þarfir gagnavera í júnímánuði.
Í tilefni af afmælinu mun Landsvirkjun einnig setja upp gagnvirka sýningu um orku og endurnýjanlega orkugjafa í Ljósafossstöð og verður hún opnuð síðar í sumar. Eftir sem áður verða orkusýningar Landsvirkjunar opnar í sumar í gestastofum við Kröflustöð og Búrfellsstöð.
Jóhannes Nordal heiðraður
Fyrsti stjórnarformaður Landsvirkjunar var Jóhannes Nordal, fyrrverandi seðlabankastjóri, en hann gegndi því starfi í 30 ár og lét af störfum 30. júní 1995. Til að sýna Jóhannesi þakklæti sitt ákvað starfsfólk Landsvirkjunar að afmarka reit til gróðursetningar við Búrfellsvirkjun og nefna hann Jóhannesarlund. Jóhannesarlundur var vígður á samkomu núverandi og fyrrverandi starfsmanna fyrirtækisins í dag. Gróðursett voru 50 tré í lundinum, eitt fyrir hvert starfsár Landsvirkjunar.