Guðrún Hafsteinsdóttir, oddviti Sjálfstæðisflokksins í Suðurkjördæmi, hefur boðað til fundar í Salnum í Kópavogi á laugardaginn kemur, 8. febrúar klukkan 14:00.
Fjöldi sjálfstæðisfélaga um allt Suðurkjördæmi hefur skorað á Guðrúnu í formannsframboð á komandi landsfundi.
„Nú styttist óðum í að sjálfstæðismenn komi saman á landsfundi til að skerpa á stefnu flokksins og velja sér nýja forystu. Þar munum við ræða um framtíðina, frelsi einstaklingsins og hvernig við tryggjum sterkt og frjálst samfélag til hagsbóta fyrir alla landsmenn,“ segir Guðrún í tilkynningu sem hún sendi frá sér í dag.
„Fyrir fjórum árum, eftir áratuga starf í atvinnulífinu, fann ég köllun til að bjóða fram krafta mína í þeirri viðleitni að móta íslenskt samfélag. Sú vegferð hefur verið krefjandi, lærdómsrík og gefandi. Ég hef notið hverrar stundar og hef lagt mig fram um að standa vörð um þau grunngildi sem við sjálfstæðismenn trúum á – frelsi, jafnrétti og rétt einstaklinga til að nýta krafta sína til fulls,“ bætir hún við og boðar því til fundarins á laugardaginn til þess að „taka samtal við flokksfélaga sína á þessum tímamótum í flokknum.“