Guðrún Hafsteinsdóttir, oddviti Sjálfstæðisflokksins í Suðurkjördæmi, er nýr formaður Sjálfstæðisflokksins, en úrslit í formannskjörinu voru kunngjörð á landsfundi flokksins í Laugardalshöll nú eftir hádegi.
Andrúmsloftið í Laugardalshöllinni var rafmagnað enda kom í ljós að afar mjótt var á mununum á milli Guðrúnar og Áslaugar Örnu Sigurbjörnsdóttur.
Alls greiddu 1862 atkvæði á fundinum en fjögur atkvæði voru ógild. Guðrún fékk 931 atkvæði, eða 50,11 prósent, en Áslaug Arna Sigurbjörnsdóttir 912 atkvæði. Aðeins munaði 19 atkvæðum á þeim.
Guðrún þakkaði traustið í ræðu í kjölfar rífandi fagnaðarláta. „Takk fyrir að sýna mér hér um helgina að Sjálfstæðisflokkurinn er lang lang öflugasta fjöldahreyfing landsins. Saman ætlum við að gera hann stærri, sterkari og samheldnari en nokkurn tímann fyrr. Ég brenn fyrir þjóð mína og landið mitt og þess vegna er þetta ekki sigur einstaklingsins. Þetta er sigur okkar allra,“ sagði Guðrún í ræðu sinni.