Veðurstofan hefur gefið út gula viðvörun fyrir Suðurland sem gildir frá klukkan 23 í kvöld til klukkan 17 á morgun, fimmtudag.
Gert er ráð fyrir austan hvassviðri eða stormi, 15-23 m/sek, með vindhviðum upp undir 35 m/sek. Búast má við mikilli rigningu og er reiknað með að skyggni verði takmarkað vegna rigningar undir Eyjafjöllum.
Það getur verið varasamt fyrir ökutæki sem viðkvæm eru fyrir vindi að vera á ferðinni og fólk er hvatt til að ganga frá lausum munum.
Viðvörunin gildir frá klukkan 8 í fyrramálið á Suðausturlandi og er varað við vindhviðum og takmörkuðu skyggni vegna rigningar í Öræfum.