Um þessar mundir eru 50 ár liðin frá því að skákeinvígi aldarinnar fór fram í Laugardalshöll milli þeirra Bobby Fischer og Boris Spassky. Þessara tímamóta var minnst síðastliðinn laugardag í sal Skáksögufélagsins á Hótel Natura.
Einvígið er að mörgum talið einn hápunkta kalda stríðsins en skákmennirnir tveir tefldu röð skáka í Reykjavík í júlí og ágústmánuði árið 1972.
„Einvígi Fischer og Spassky um heimsmeistaratitilinn í skák árið 1972 í Reykjavík hafði meiri áhrif heldur en nokkur óraði fyrir, bæði í heiminum öllum en ekki síst hér á Íslandi. Það var ekki aðeins að Ísland og Reykjavík urðu þekkt heldur varð gróskan í skákheiminum meiri en nokkur gat vænst,“ sagði Lilja Alfreðsdóttir menningar- og viðskiptráðherra meðal annars við tilefnið.
Þá greindi ráðherra einnig frá áforum ríkisstjórnarinnar í samstarfi við Reykjavíkurborg um að halda opna samkeppni um minnisvarða um einvígið. Einnig verður tímamótanna einnig minnst með vitundavakningu um skák í skólum, málþingi og sérstakri afmælishátíð sem nær hápunkti dagana 25.-30. október þegar fram fer heimsmeistaramótið í Fischer-slembiskák.
Bobby Fischer flutti til Íslands og fékk íslenskan ríkisborgararétt árið 2005. Hann lést árið 2008 og var jarðsettur í Laugardælakirkjugarði í Flóa og árið 2013 var Fischersetrið á Selfossi opnað, en það er í senn safn til minningar um Bobby Fischer og félagsheimili fyrir skákmenn.
