Bæjar- og fjölskylduhátíðin Hamingjan við hafið fór fram í Þorlákshöfn í síðustu viku. Boðið var upp á fjölmarga dagskráliði þar sem allur aldur fékk eitthvað við sitt hæfi.
Sem dæmi um viðburði má nefna froðurennibraut og froðubolta, sundlaugapartý, garðtónleika um allan bæ í samstarfi við Hljómlistafélag Ölfuss, litaskrúðgöngu og hverfapartý í bræðslunni, barnasprell með ótal leiktækjum, sirkus og leikvelli með opnum efnivið, sandkastalagerð, sjósund, Leikhópinn Lottu, sýningar og sölur um allan bæ og svo margt fleira.
Hápunktinum var svo náð með stórtónleikum í tilefni af 70 ára afmæli Þorlákshafnar, þar sem fram kom fjöldi listamanna. Hljómsveitin Albatross með Sverri Bergmann í fararbroddi var á sviðinu í tvær og hálfa klukkustund en með þeim komu fram Anna Magga, Júlí Heiðar, Emilía Hugrún, Lay Low, Jónas Sig, Ragga Gísla og leynigesturinn Magnús Þór ásamt Lúðrasveit Þorlákshafnar og Fjallabræðrum.
Ása Berglind Hjálmarsdóttir, verkefnastjóri Hamingjunnar við hafið, segir að það virðist hafa verið almennt álit viðstaddra að þessir tónleikar hafi verið á meðal þeirra bestu sem sem fólk hefur upplifað, svo mikil var ánægja tónleikagesta.
„Halldór Gunnar, sem fer fyrir bæði Fjallabræðrum og Albatross sagði að það væri langt síðan honum hefði liðið eins vel á sviði og þetta kvöld, salurinn söng með eins og einn maður. Lúðrasveitin og Fjallabræður voru upp á sitt allra besta og stjörnurnar sem komu fram sem gestasöngvarar skinu sínu skærasta ljósi,“ segir Ása Berglind.
Ókeypis aðgangur var að þessum glæsilegu tónleikum, eins og öllum öðrum viðburðum á hátíðinni og segir Ása Berglind sérstaklega vert að þakka öllum þeim fjölmörgu aðilum sem komu að hátíðinni, sem Sveitarfélagið Ölfus stendur fyrir.
„Þetta væri ekki hægt án þeirra fjölmörgu aðila sem leggja hátíðinni lið, ýmist í formi fjárframlags eða annarskonar stuðnings. Bestu þakkir til allra sem komu að hátíðinni á einn eða annan hátt og sérstaklega til þeirra fjölmörgu gesta sem komu, sáu og skemmtu sér eins fallega og raun ber vitni,“ segir Ása Berglind að lokum.
