Harður árekstur tveggja bíla varð á Suðurlandsvegi við Uppsali í Flóahreppi á þriðja tímanum í dag.
Samkvæmt upplýsingum frá lögreglunni á Suðurlandi voru samtals fimm í bílunum tveimur og var fólkið flutt til skoðunar á slysadeild á Selfossi. Meiðsli þess hafi þó virst minniháttar.
Bílarnir eru báðir mikið skemmdir og hestakerra sem annar bíllinn dró hafnaði utanvegar. Suðurlandsvegur var lokaður á meðan viðbragðsaðilar athöfnuðu sig á vettvangi en hann hefur nú verið opnaður á nýjan leik.
Lögreglan á Suðurlandi rannsakar tildrög slyssins.