Gröfutækni á Flúðum átti lægsta tilboðið í gerð hringtorgs á hlaðinu við Grund á Flúðum en tilboðin voru opnuð í dag.
Nýja hringtorgið er á mótum Skeiða- og Hrunamannavegar, Langholtsvegar og Túngötu á Flúðum og á það að vera fullbúið þann 13. september næstkomandi, en hringtorg og yfirborð gatna með kantsteinum og öllum merkingum skal vera tilbúið fyrir 15. júlí.
Í framkvæmdinni felst einnig gerð stíga og stígtenginga og færsla og endurnýjun á fráveitu-, hitaveitu-, raf-, og fjarskiptalögnum.
Tilboð Gröfutækni hljóðaði upp á tæpar 177 milljónir króna og er 81,6% af áætluðum verktakakostnaði Vegagerðarinnar. Eitt annað tilboð barst, frá Berg verktökum í Reykjavík og hljóðaði það upp á tæpar 208,4 milljónir króna.
Verkið er samstarfsverkefni Vegagerðarinnar, Hrunamannahrepps og veitufyrirtækja.
