Ákveðið hefur verið að hafa Hveragarðinn í miðbæ Hveragerðis opinn í vetur í ljósi mikils fjölda ferðamanna sem hefur viðdvöl í bæjarfélaginu.
Að sögn Aldísar Hafsteinsdóttur, bæjarstjóra, er mikil eftirspurn eftir afþreyingu og er vetraropnunin liður í því að koma til móts við ferðaþjónustuna hér í bæ.
Frá og með 7. nóvember verður Hveragarðurinn opinn milli kl. 9:00 og 13:00 alla daga vikunnar. Kvöldopnun verður í Hveragarðinum á fimmtudags- og föstudagskvöldum milli kl. 18:00 og 21:00.
Í desember er ætlunin að hafa notalega jólastemningu í húsinu og aldrei er að vita nema að uppúr hverunum komi rjúkandi kakó um leið og rúgbrauðið er sótt og eggin soðin.
Lýsing hefur verið sett upp í Hveragarðinum sem vakið hefur mikla athygli en eykur hún mjög dulúð hins sérstaka svæðis. Einnig er goshverinn Eilífur sprækur sem aldrei fyrr en flestum finnst gaman að sjá hinn magnaða kraft sem finnst í íslenskri náttúru.