Vatnajökulsþjóðgarður harmar slysið á Breiðamerkujökli og er hugur starfsfólks þjóðgarðsins er hjá þeim sem eiga um sárt að binda vegna slyssins.
Í tilkynningu frá þjóðgarðinum segir að hann hafi farið þess á leit við þá ferðaþjónustuaðila, að þeir fari ekki í íshellaferðir á svæði þjóðgarðsins að svo stöddu. Allir hafa brugðist vel við þeirri beiðni.
Heimildir Vatnajökulsþjóðgarðs til að loka fyrir umferð um svæðið eru takmarkaðar. Vatnajökulsþjóðgarður og Ferðamálastofa hafa þegar hafið samtal við hlutaðeigandi aðila innan ferðaþjónustunnar og stjórnsýslunnar um mögulegar úrbætur og aðgerðir vegna þessa hörmulega slyss.
Rekstraraðilar sem hafa leyfi til íshellaferða og jöklagangna innan þjóðgarðsins þurfa að vera með eigin öryggisáætlun og einnig að vera með leyfi sem ferðasali dagsferða frá Ferðamálastofu. Einnig þarf að uppfylla gildandi gæðaviðmið varðandi íshellaskoðun og gönguferðir í fjallendi við vetraraðstæður og á jöklum.
Í tilkynningunni frá þjóðgarðinum segir að til skoðunar hafi verið að gera enn meiri kröfur til rekstraraðila sem starfa í þjóðgarðinum og hefur sú vinna verið unnin í nánu samstarfi við hagsmunaaðila. Von er á tillögum síðar í haust.
Þá vill þjóðgarðurinn þakka þeim fjölmörgu viðbragðsaðilum sem sinntu störfum við afar krefjandi aðstæður og öðrum sem lögðu björgunaraðgerðunum lið.